1Cor 4 | APZ | STEP | Sekwo ngko Poul nontnne'no Apoulousɨ'nji nom'ne sohwamne'no olo so'no huno fɨsyafɨhupmno. Nakwo Anɨtuye hungkuno selɨmentɨhwone sohwona'ni nakwo Kɨlaisɨye syoho ulohofiyo hwona'nyoho. Kɨlais kako nakumo Anɨtuye hungkuno hiyaso wo'mojoso nejopahonɨngki nakwo sekumo sejopalokuhwono.

1 Corinthians 4

Anɨtu kako Kɨlaisɨye syoho ulohofiyo sohwafe syoho somne'no yamofo ulohofonefoho.

1 Sekwo ngko Poul nontnne'no Apoulousɨ'nji nom'ne sohwamne'no olo so'no huno fɨsyafɨhupmno. Nakwo Anɨtuye hungkuno selɨmentɨhwone sohwona'ni nakwo Kɨlaisɨye syoho ulohofiyo hwona'nyoho. Kɨlais kako nakumo Anɨtuye hungkuno hiyaso wo'mojoso nejopahonɨngki nakwo sekumo sejopalokuhwono. 2 A'amu nom'nimo Anɨtuye hungkuno lutɨhwawo'nɨngkiso sohwo kako kakoe Hwe Engo oso syoho uyɨmentiso sohumne'no syoho yokumpohn'nyo uyono. 3 Ngko Anɨtuye syoho yalokwe loso'no sekwo yamofo ntohopijoso ngko sekwoe huno somne'no ngko huno pi'nɨngo mosyafɨhu'mnehono. I ngko huhwo'ni olo syoho Anɨtumne'no yalokwe loso'no ngko yamofo maloho'nɨmnehono. 4 Hwapɨngoso ngko olo syoho yalokwe loso'no wopɨngofoho huno ko syafɨhu'meso oso huno hwasyo'manji olo syoho homo losomne'no ngko yamofo nto'no pipi loho'nɨmnehono. I oso'no ngko hwe wopɨngo hwo'nyoho eso mahnnɨmnehono. O'o, nje Hwe Engo sohwo kako nje syoho so'no olo wonyofoho, olo wopɨngofoho, oseso nje Hwe Engo sohwo kako'nohini wantɨmontonoho. 5 Oseso sekwo nom'ne a'amufe yahino somne'no wonyofoho nulɨkutoho. O'o, fohontohumamno. Nakwoe Hwe Engo sohwo asomo poso sohonta kako nakwo a'amu hopi'nonohino hn'nɨmo yamofo wonaloho'montonoho. Yo'mayo yahino wonyo huno wonyo hiyaso'mo wojoso kako utɨhwa'nyopo ujo wehontojwahumontonoho. Oso hohosohonta a'amu syoho wopɨngo yontɨfijo somo Anɨtu kako'nohini a'amu anga'no anga'nohino somo, Kɨko syoho wopɨngo'njo hwosoho. Kɨko wopɨngo'njo kiyoho, ose ulonefoho.

A'amu Koulin humamotofoso hofɨko hofɨkoe yofe ho'noma'nɨmotofofoho.

6 U, nje a'amu soku, ngko sekumo olo hungkuno selalokwe loso ngko'nji Apoulousɨ'ntnne'no selalokweno. Hungkuno hiso sekumo yahino wopɨngo somo setɨhwayo'nefoho. Sekwo Anɨtuye hungkunomo hwotoho fekutoho. I oso'no sekwo yokumpohn'nyo imo'nɨngkuji nom'ne a'amufe yofeso monje yasyɨkuji nom'ne a'amufe yofe'nohini noho'nomafɨkutoho. U, nje a'amu soku, sekwo oleso nolɨkutoho. Poulɨ'nji Apoulousɨ'nji siko nakwoe hwe engo hwa'uyoho. Ose lɨkuji sekwo nom'ne a'amu sohwafe yofeso monje yasyɨkutoho. 7 I sekwo yo'mayo huno wopɨngo syafɨsyɨwo'nɨngkohofoso ntɨ'mta'angoto. Oso huno wopɨngo hiso sekumta'ango'maho. O'o, Anɨtu kako sekumo sejapmmentisofoho.

8 Sekwo huno ole losyofɨsyalokwofo. Nakwo Anɨtuye hungkuno hopi'nonohinoso huno nto'no nayohoho. Yo'mayo nakwo nto'no humayo so'no Anɨtu nto nejapmmasofoho. Nakwo nom'ne a'amu Anɨtuye hungkuno lonetɨhwamentohofo sohwamo uyokolofontani nakwo hwe engo nto imo'nɨmalohwono. Sekwo oso hwasyo hunoso losyofɨsyalokwofo. I sekwo hwe engo ne imo'nɨfijontentesi nje sɨmehoso wopɨngo nto nɨmo'nɨngkuhwonesohilo. Oso'no sekwo nakwo'nji hwe engo nto humehwanesohilo. 9 Ngko huno ole syofɨsyalokweno. Anɨtu kakoe hungkuno lɨku'mofɨwo'nɨngkuhwone (apousel) sohwona'nɨmo nom'ne a'amu sohwafe sɨfɨki'nyo'mo nehumajɨ'nyo pa'nyo hwona'nyoho. I a'amu nakumo ole nalinyo pa'nyo hwona'nyoho. Hofɨko poyo wape'nɨfe ose nalontɨfi hofɨko oso'no nakumo a'amufe tɨmopo wofonjonesyantɨfe'no yalokwofo. Oso'no a'amu hopi'nono hwahoponjo so'nji ahwomomjo so'nji hofɨko yo'mayo ne'mawo'nɨngkiso somo nehonalokwofo. 10 Nakwo Kɨlaisɨye yofe ho'nomayo'ne kakoe hungkuno lɨku'mofɨwo'nɨngkuhwone so'no a'amu hofɨko nakumo nonahonontɨfi hofɨko ole nalɨwo'nɨngkohofɨhwona'nyoho. Sekwo omomo huno'njo hwasoho. Ose nalɨwo'nɨngkohofofoho. I oso'no sekwo sokune'no huno ole syofɨhu'nalokwofo nakwo Kɨlaisɨye a'amu'nwoho. Nakwo huno'njɨ'nwoho. Ose syofɨhu'nalokwofo. I nakwo Anɨtuye hungkuno lɨku'mofɨwo'nɨngkuhwone sohwona'nɨmo a'amu hofɨko nakumne'no sitofo nalɨwo'nɨngkohofi, Sekwo yokumpohn'nyo ane hwasoho. Ose nalɨwo'nɨngkohofofoho. I sekwo soku sekwo huno ole syofɨhu'nalokwofo. Nakwo yokumpohn'nyo wopɨngo'njɨ'nwoho. Ose syofɨhu'nalokwofo. Hofɨko nakune'no ole nelalokwofo. Sekwo yo'mɨngohwasɨ'maho. I sekwo soku sekwo huno ole syofɨhu'nalokwofo. A'amu hofɨko nakwoe yofe ho'nonemalokwofo. Ose syofɨhu'nalokwofo. 11 Nakwo a'amu Anɨtuye hungkuno lɨku'mofo syoho'njo sohwona'ni mijoho'no hohonta humamentɨhwone somta'angoso olohonta hohonta mijo wosopayo oso'no mijoho'no humalohwono. Olohonta nakwo hwapɨfe wonyo'nji nohumentanɨngkuhwoni nakwoe mango sohwa hofɨko nakumo aho ku'mokontɨfi nefonjalokwofo. Nakwo ango'meemo uku'mofahonɨngkuhwoni nakwoe ango sopo nakwo fosyawe'ne nakwoe angoso ane hwona'nyoho. 12 Nakwo nakwoe yokumpohn'nyo'nji nakwo syoho tohohmtnno'njo yontani yo'mayo wosopayo oso mayo'ne hamniyoho tɨpemalokuhwono. A'amu pi'nɨngo engoso nakune'no lalokwofo. Oso hwamne'no nakwo hofɨkimo wopɨngo ulohofo'ne Mpohumo jomo ulɨwo'nɨngkuhwonefoho. Hofɨko nakumo wonyo nelohofahonɨngkofi nakwo hofɨkimo oso wonyo hiso hofɨkimo aku muyofoho. O'o, nakwo tɨmo'nohini uhwontohumalohwono. 13 Hofɨko nakune'no sitofo wonyo nelahonɨngkofi nakwo hofɨkimo sɨmeho pompengo ifɨsyumofo'ne hungkuno wopɨngo'nohini ulɨwo'nɨngkuhwono. Nakwo olo hwaho loponjo hintalinyo pa'nyo hwona'nyoho. Nakwo a'amu jopaho ho'naofɨwo'nɨngkohofo pa'nyo hwona'nyoho. Oso pa'nyoso nakwo ne'no humomopontani olohonta ose'no humalohwono.

A'amu Koulinɨso hofɨko Poulɨye yahinomo tɨfi unɨngkafe.

14 Ngko olo hungkuno mtɨ'mokohe loso sekumo wonɨmango ifisyasemofo'ne'maho. O'o, awonoho. U, nje mehomi soku, ngko sekumo hitoho ntofantokunjo soku, sekwo olo nje hungkuno lomo nupa'nɨngkuji huno nto'no fɨsyafɨhupmno. Yahino wopɨngoso wolosetɨhwamne'no yohono. 15 A'amu pi'nɨngo engo hwalɨkeno anga'nohino hwalɨkeno, oso hwa hofɨko sekumo nose'mantɨfi hofɨko Kɨlaisɨye yahino so'no losetɨhwawo'nɨngkohofoso oso wopɨngofoho. Oso'no ngko hungkuno ane hwo'nyoho. I oso'no senɨngkwohwo sohwo pi'nɨngohwo'maho. O'o ngko senɨngkwohwo ne sohwo'ni ngko Poulɨ'nyoho. Ngko nɨhu'no sɨmo'mo Jisas Kɨlaisɨye yahino so'no losetɨhwahonɨngko sekwo kakoe hungkuno wopɨngo somo nupa'nontɨfi Kɨlais kakimo inɨngkawentɨfi sekwo nje mehomi ne imo'nɨmentohofofoho. 16 Olo hungkuno loso yokumpohn'nyo waselɨmonne'no yohono. Sekwo ngko senɨngkwohwo ne sohwo'niye hunoso mafɨkuji sekwo nje yahino somo tɨfi finɨngkamno. 17 Oso hiso'no ngko sekuye pone'no Timoutimo uhwojalokweno. Kako nje hwomu ne pa'nyo hweho. Ngko kakine'no nɨmo'nɨwo'nɨngkiso hweho. Kako nakwoe Hwe Engo Kɨlaisɨye syoho somo hofiyo'no mokosyohumawo'nɨngkiso hweho. Ngko Kɨlaisɨye yahino wopɨngo osomo inɨngkowalokwe so'no Timouti kako sekwoe hunomo wasefohoto'monte'nefoho. Oso Kɨlaisɨye yahino hiso nakwo a'amu hwahoponjo hn'nwiye pa'nyo'maho. O'o, kakoe yahinoso songo wonyoangkafofoho. Timouti kako sekumo a'amu ango'meemjo somo Anɨtuye hungkuno lutɨhwawo'nɨngkoheso sekumo wolosetɨhwamontonoho.

18 A'amu sekwo'nji humalofoso ole lalokwofo Poul kako nakumo mone'manehoho. Ose lontɨfi hofɨko hofɨkoe hunomnohini inɨngkawentɨfi yokumpohn'nyo imo'nalokwofo. 19 Nakwoe Hwe Engo Anɨtu sohwo kako nje honɨngkano mopɨjasiyo'njo ihwoso'no ngko sekwoe angopo komo'no wose'ma'monnoho. Ou, osopo nose'mahm'mo ngko oso ango hopo soponjo a'amu yokumpohn'nyo imo'nɨmentohofo osohwafe hungkunoso mupa'nɨmnehono. O'o, hofɨkoe syoho hofɨko Anɨtumne'no yalokwofo osomo ngko yamofo uloho'monnoho. Oso syoho hiso ne'njotɨkeno. Ne anetɨkeno, lɨ'mo uhwonɨmonnoho. 20 Anɨtu kakoe a'amu ne somo mokosyohumawo'nɨngkiso oso hwa hofɨko mango'nohino hwa'maho. O'o, hofɨko Anɨtuye Towahunofe yokumpohn'nyoso hi'njo hwafoho. Oso'no hofɨkoe syoho iwo'nɨngkohofoso ne'njofoho. 21 Oseso sekwo peho'no semo'nosoto. Ngko sekumo nose'mahm'mo peho hungkuno selɨmnehono. Sekwo nje hungkunomo haloho maposo'manji ngko sekumo nto'no mesehwajiyo'ne sɨmeho tohino'nji yoka yokumpohn'nyo walɨmonnoho. I sekwo nje hungkuno homo somo hofiyo'no inɨngkafijo'manji ngko hungkuno wonyoangkafo waselɨmonnoho. Oso'no ngko sekumo pipi seloho'mnehono. O'o, sekwoe syohofoho.